Sui cjamps si slungje la ombre dal neri

da Alessandro Di Giusto

E je une ombre che si slargje simpri plui menaçose su la nestre regjon, buine di cancelâ lis ciertecis di cui che al è convinçût che, chi di nô, in fonts il rispiet des regulis al è ancjemò ben presint. E chê dal lavôr neri, dal sfrutament de lavoranzie, de violazion des normativis in materie di sigurece e dal contrat coletîf di lavôr. E je une ombre pesante, che e rivuarde tancj setôrs economics, ma che e sta planc a planc gjavant lûs ancje a chel agricul.
Parcè che se i controi dal Ispetorât dal lavôr, dai Carabinîrs e de Vuardie di finance a evidenziin dispès violazions ancje gravis in setôrs come la edilizie, i servizis aes personis e la ristorazion (cjapâts dentri ancje i bars), al è ancjetant palês che intai nestris cjamps a son in azion aziendis – tra chestis a son tantis cooperativis – che a proponin, dispès a coscj bas in maniere di no crodi, lavoranzie par fâ voris dulà che la machine ancjemò no à dât la volte al om. E dispès i lavoradôrs cjatâts dilunc dai controi, a son in neri, iregolârs o clandestins, cence cualsisedi formazion e, dal sigûr, cence tutele.
“Dopo di un control fat intun fonts agricul dongje Tresesin e je stade cjatade la presince di une aziende che e faseve ativitât di supuart ae agriculture. Cheste aziende e je stade sanzionade par no vê butât jù il Document di valutazion dai pericui e pe presince di doi lavoradôrs in neri. E je stade disponude la sospension de ativitât imprenditoriâl par lavôr neri e par violazions gravis su la sigurece”.
O ripuartìn une sintesi dal comunicât mandât aes redazions ai 23 di Fevrâr dai Carabinîrs dal Nucli ispetorât dal lavôr di Udin parcè che al riassum cetant che al è daûr a sucedi un pôc dapardut: al imprenditôr agricul i ven proponût un contrat vantazôs in maniere di no crodi di int che si presente intal miôr dai mûts, ma dopo la realtât fate vignî sù dai controi e je dal dut divierse.
“O vin cressût la presince sul teritori – nus sclarìs il colonel Davide Cardia, comandant provinciâl de Vuardie di finance – orientantsi sui setôrs che, par vie de stagjonalitât des lavorazions, a presentin i pericui plui grancj. Si sin interfaçâts cu lis associazions di categorie sei Coldiretti che Confagriculture par sburtâ i associâts ae legalitât inte assunzion dal personâl, ancje parcè che si è daûr a regjistrâ il disflorî di aziendis che a ufrissin bracents a presits masse bas. O vin cjatât lavoradôrs che a cjapavin tra i cuatri e i sîs euros a front dai 7,50 previodûts dal contrat. Cui che si rimet a chestis aziendis al abade plui al tacuin che a cui che al è daûr a meti a lavorâ intai siei cjamps, magari contant sul fat che il contrat di apalt i permet di scjariâ dutis lis responsabilitâts, intant che invezit al va a pericul di vê di rispuindi in prime persone”.
Ancjemò plui diret Alessandro Zanotto, coordenadôr regjonâl de Flai-Cgil fin al Fevrâr stât: “Intal setôr agricul, a son daûr a fâ strade aziendis che a ufrissin scuadris di lavoradôrs iregolârs creant no pôcs vuascj in tiermins di concorence sleâl. Fevelìn di int impleade dispès in cundizions inacetabilis, tant di podê jessi cualificâts tant che ‘gnûfs sclâfs’. I controi no bastin parcè che e je une regjie ben precise, che e ponte propit sul sfrutament di chestis personis. A pene che a cressin i controi, si cjatin fûr situazions difondudis di ilegalitât, ma nol è just pensâ che al sedi un fenomen gnûf: i segnâi a jerin di timp. O vin proponût la istituzion di un osservatori che al fasi lûs su la situazion e al permeti di decidi des strategjiis. Dome un ipocrit no si è acuart che fin dilunc des fiestis nadalinis e jere int a vore intai vignâi”. (A.D.G.) – 24.03.2023

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui