Cheste matine, il prefet di Udin, Domenico Lione, al è stât a cjâf de riunion dal Comitât Provinciâl pal Ordin Public e la Sigurece inte Prefeture. A jerin presints l’assessôr regjonâl pe Sigurece Roberti, i sindics di Glemone, Osôf, Dartigne, Bordan, Montenârs e Trasaghis, il cuestôr De Lorenzo, il comandant provinciâl dai carabinîrs Broccone e il comandant provinciâl da Vuardie di finance Loero.
In cheste ocasion a son stadis analizadis lis tindincis de criminalitât tai comuns che a partecipavin ae riunion, soredut a pet dai ultins doi agns, notant che i reâts a son lats jù tal 2025.
Al è stât evidenziât che i sfuarçs di prevenzion locâi a si zovin dal rinfuarciment dai sistemis di video control cui dispositîfs di leture des targhis instalâts di pôc timp, colegats cu lis Centrâls operativis de Polizie Locâl e chês des fuarcis dal ordin, che a metin a disposizion un imprest preziôs pes investigazions.
Chescj sistemis a vegnin rinfuarçâts ancjemò di plui in gracie de realizazion di progjets za aprovâts e finanziâts. In chest sens, il Prefet al à ringraciât l’assessôr regjonâl pe Sigurece, stant che l’obietîf al è stât cjapat in gracie dai finanziaments straordenaris che la Regjon e à metût a disposizion dai comuns.
In chest sens, Roberti al à ancje evidenziât che a son previodûts contribûts pai sistemis di alarme privâts, par rinfuarcî ancjemò di plui la lote e la prevenzion cuintri des robariis. Par chest i fonts a saran prolungjâts pal 2026.
Vie pe riunion, e je stade ancje discutude la necessitât di dâ une atenzion particolâr tal da cuintri des fraudis che a rivuardin i vecjos cun campagnis di informazion, par pandi il plui pussibil lis misuris di precauzion che a varessin di jessi cjapadis par evitâ chescj reâts.
Il cuestôr di Udin al à dit che, par miorâ ancjemò di plui i sfuarçs di prevenzion inte zone, al inmanearà controi di “alt impat”, in mût particolâr intes zonis dongje des scuelis.
Il Comandant Provinciâl dai Carabinîrs, di bande sô, al à dit che i sfuarçs di prevenzion inte zone a saran rinfuarçâts e justâts ancjemò di plui su la fonde des analisis dai reâts. (a.d.g.) – 13.01.2026
