Martars ai 4 di Març, vie pe sere sul tart i carabinîrs dal nucli radiomobil di Sacîl a àn arestât a Brugnere un zovin dal puest par detenzion di droghe pal spaç daspò di un inseguiment.
Tor des dîs e mieze di sere un citadin al veve clamât par visâ dai moviments stranis di une Fiat Panda rosse dongje dal cjamp di balon, inte localitât Tamai. Cuant che i carabinîrs a son rivâts sul puest e cun dut dal alt dât de patulie, il zovin al à cirût di scjampâ. Dilunc dal inseguiment curt de machine, a jerin stâts tirâts doi sacuts che une volte recuperâts dai carabinîrs a vevin dentri il prin 200 grams di marihuana e chel altri un chilo di hashish. Une volte fermade, dentri de machine a son stâts cjatâts altris 90 grams di hashish, un belancin di precision e un curtìs.
Te cjase dal zovin a son stâts invezit cjatâts 2.700 euros, ancje chei metûts sot secuestri. Il zovin si cjate cumò ai arescj domiciliârs, convalidâts vuê di matine. (a.d.g.) – 07.03.2025
