Ducj a sperin che nol sedi sucedût nuie a David Di Gleria, l’om di 48 agns di Paulâr che al è lât a combati in Ucraine e che di lui no si sa plui nuie dai 11 dai Setembar.
La gnove le à dade îr sot sere Il Tg1 fevelant di “missing in action” ven a stâi sparît in bataie, mût di dî che si dopre pai soldâts che no si sa plui nuie di lôr.
David al jere jentrât te brigade Azov, une des unitâts dal esercit ucrain impegnade intes bataiis plui duris. Dal om si son pierdudis lis olmis inte zone di Luhansk, sot control dal invasôr rus.
Une vore in pinsîr i gjenitôrs, la mari Ameriga che par une vore di timp e à vût une buteghe di pomis e verdure a Sapade e il pari Silvano, militâr in pension. I gjenitôrs di un mês no vevin gnovis dal fi. Ancje i tancj amîs che David al à in Cjargne a sperin di vê prest gnovis buinis di David, che dopo jessi lât ator pal mont al veve decidût di judâ i ucrains a difindisi de invasion. (a.d.g.) – 25.09.2025
