Socorût anzian sul Plan dal Cjaval dopo che si jere pierdût

Lunc intervent, vie pe gnot, sul Plan dal Cjaval dulà che un anzian si jere pierdût. L’alarme al è partît prime des 8 di sere. L’om di 80 agns al jere rivât su la Cime Col Cornier ma, tornant indaûr, forsit ancje pal rivâ dal scûr, al veve pierdût l’orientament su la beorcje tra il troi dal Col Cornier e chel che al va jù a Casere Cjamp. Spaurît al à decidût alore di clamâ il 112.
Par individuâ la sô posizion al è servît plui timp dal previodût stant che, daurman dopo la clamade, il so telefon si è scjariât e, duncje, nol è stât pussibil otignî lis coordenadis. (ADG) – 23.09.2022