Tra lis 10 e lis 11 e mieze di sere, plui o mancul, dai 15 di Març la stazion dal Socors Alpin e Speleologjic e à fat un intervent tal Cjanâl de Ciline pal socors di doi escursioniscj trevisans, dopo jessi stade alarmade cuntune clamade al Nue112 dai familiârs di un dai doi escursioniscj, che al varès vût di tornâ indaûr intal dopomisdì. I doi apassionâts a vevin visât che a saressin partîts de Val Cimoliane o sedi l’anel dal Bivac Marcs Granzotto passant pe Casere Pecoli, intes Dolomitis Furlanis. I socoridôrs ju àn cjatâts che a jentravin dilunc de strade de Val Cimoliane, scanâts ma in buinis cundizions di salût.
L’intart al è di podê imputâ a plui causis. Intant, la strade de Val Cimoliane e je sierade par lavôrs a cinc chilometris di Cimolais: chest element al à fat sì che i doi escursioniscj a vedin vût di lassâ la machine a plui o mancul 8 chilometris dal Ripâr Pordenon, che al sarès stât invezit il vêr pont di partence pe lôr escursion. Po dopo, par vie des neveadis dal dì di prime il lôr percors al à domandât plui timp e infin, al svicinâsi dal scûr, i doi a àn pierdût par un trat il troi, scugnint dopo tornâ a fâ il stes a storpeôs par recuperâ il segn just. I doi escursioniscj a son stâts cjatâts ae altece di Pian Fontane – dulà che i socoridôrs a son rivâts pe gnove viertidure de strade difûr dal orari di lavôr – e, cjariâts sul fûrstrade dai socoridôrs, a son stâts condots al cjalt e ricreâts prime de lôr tornade a cjase. (A.D.G.) – 16.03.2023
