Si bute intal Lusinç: muart zovin a Gurize

Tragjedie tal parc Piuma di Gurize, bande lis 5 dopomisdì di domenie, cuant che un fantat di 17 agns al à pierdût la vite intal Lusinç. Il zovin al jere saltât intal flum, ma nol è plui lât fûr de aghe. Daurman al è tacât l’alarme, cuntune scuadre des Vuardiis dal fûc dal comant di Gurize, il supuart dai subacuis dal Nucli regjonâl di Socors subacui acuatic di Triest e il personâl sanitari. Dopo almancul trê oris di ricercjis, i subacuis dai pompîrs a àn cjatât e recuperât il cuarp cence vite dal zovin, di origjin tunisine, al parc in compagnie di un gruput di fantats forescj, che a àn dât daurman l’alarme. Il zovin al jere ospit di là di un an dal centri San Luigi, la struture dai salesians che e acete minôrs no acompagnâts. (A.I.) 05.09.2022