Secuestrade dai Financîrs dal Comant Provinciâl di Pordenon une tonelade di tabac lavorât e 4 toneladis di filtris e cjartinis, pronts par confezionâ spagnolets. Dulinvie de operazion al è stât arestât ancje un autotraspuartadôr forest.
Il risultât, pardabon imprevist se dome si pense che des nestris bandis il cuintribant di spagnolets al jere prerogative di un passât tant lontan, al rive dopo la intensificazion dai controi fats inte zone industriâl di Davian, dulà che i agjents a vevin savût de presince pussibile di un dipuesit clandestin di tabac.
Une patulie des Flamis Zalis e à controlât un camion cun targhe foreste, intune aree di fermade, che al so interni a jerin contignûts 4 cuintâi di tabac masanât, dividûts in doi scjatulons, di là di tancj scarts de produzion di spagnolets (pachets di assemblâ, covertoriis internis e filtris). Il conducent, un citadin rumen, nol è stât bon di furnî nissun detai su la cjame e nancje su la destinazion efetive de marcjanzie traspuartade, lassant dome intindi di jessi in spiete di disposizions.
Ispezionant cun atenzion la aree dongje, i militârs a àn cjatat un magazen, in aparence dismetût, che però, a une cjalade plui atente, al puartave segns clârs di frecuentazion. I Financîrs pordenonês a son jentrâts intal locâl, cjatant altris sîs cuintâi di tabac lavorât e tancj scjatulons che a contegnin materiâi pal confezionament di spagnolets. L’autotraspuartadôr al è stât arestât par cuintribant di tabacs e, su disposizion de Autoritât judiziarie, puartât inte Cjase Circondariâl di Pordenon. Dute la marcjanzie e je stade mitude daurman sot secuestri, cussì tant che il mieç pesant doprât pal traspuart. (a.d.g.) – 25.01.2024
