La polizie sul confin di Triest, sot de direzion de Procure de Republiche, e à sdrumât une organizazion criminâl cinese che e judave la imigrazion no regolâr dulinvie de rote balcaniche.
La investigazion, coordenade dal procuradôr vicjari Federico Frezza, e je tacade cul arest di un citadin cinês in Avrîl, cjatât intant che al puartave inte sô auto cuatri siei conazionâi rivant de Slovenie.
I agjents a àn discuviert un flus continui di migrants cinês iregolârs che a jentravin in Europe soredut de Serbie e di li a vignivin puartâts bande de Italie dilunc de Bosgne, de Cravuazie e de Slovenie. Une volte rivâts intal nestri Paîs, a vignivin puartâts intune “cjase sigure” a Cazzago di Pianiga, dongje Vignesie, di indulà che daspò a jerin spedîts in altris regjons talianis o in altris Paîs europeans. (a.d.g.) – 26.06.2024
