Nûf sogjets a son indagâts par robarie ingriviade ai dams dal Stât, detenzion di animai salvadis une vore tuteladis,detenzion no legâl e altris reâts tra Friûl e Venit. Intai dîs passâts e je stade finide une indagjin dai carabinîrs forestâi dal Nucli Cites di Triest e dal Cuarp forestâl de Regjon F-Vj, coordenâts dal public ministeri Elisa Calligaris di Udin.
Lis investigazions a son ladis indenant par plui di un an e a àn permetût di scuvierzi un trafic no legâl di uciei di riclam. I uciei, secont le acuse, a vignivin cjapats dilunc dal periodi di migrazion e i traficants ju fasevin deventà regolârs doprant anei falâts o piês doprant anei bogns ma metûts su fasint mâl aes besteutis.
Dilunc des percuisizions a son stâts secuestrâts 337 esemplârs di divignince no legâl, tramais e robe par cjapâ i uciei, come che rêts.
Il zîr di afârs al è di miârs di euros parcè che dome un esemplâr cjapât al puest costâ fintremai 400 euros. Intes rognis al è finît un arlevadôr di Udin che al veve ancje metût su un implant platât par cjapâ i uciei. (a.d.g.) – 28.07.2025
