Ancjemò une fabriche clandestine par produsi spagnolets in Friûl. Cheste volte i agjents de Vuardie di finance le àn cjatade a Spilimberc, dentri di un capanon di 9 mil metris cuadris. La operazion, fate dai financîrs di Udin e di Pordenon, e à permetût ancje di arestâ siet personis e di secuestrâ dôs liniis produtivis, 78 toneladis di tabac e 25 milions di pacuts cun marchis falsis. Cualchi mês indaûr al jere stât scuviert un implant di produzion a Remanzâs, che al jere bon di produsi milions di spagnolets e cun dentri 21 oms a vore tignûts tant che sclâfs.
Vie pe gnot tra i 27 e i 28 di Mai, i agjents che a tignivin di voli cierts capanons in provincie di Pordenon a àn viodût jentrâ un camion grues dentri di un imobil, che dopo cualchi ore al jere tornât a partî. I agjents i son stâts daûr e cuant che il camion al stave par passâ il confin cu la Austrie lu àn blocât par fâ dai controi. Dentri dal autoarticolât a jerin machinaris doprâts par fâ spagnolets e par chest al è stât decidût di fâ daurman un intervent li dal capanon che si cjatave a Spilimberc. Une volte jentrâts i financîrs a àn cjatât une tra lis fabrichis clandestinis par fâ spagnolets plui grandis mai scuviertis in Italie: sîs citadins stranîrs, forsit a vevin capît che lis fuarcis dal ordin a stavin par rivâ e a stavin cussì smontant i machinaris dentri dal capanon. Come a Remanzâs, la energjie eletriche e jere garantide di gjeneradôrs une vore potents, che cussì nol coventave doprâ energjie de rêt. Dentri de fabriche ancje une sale di control par cjalâ cun telecjamaris ce che al sucedeve ator dal stabiliment.
Cuant che a son rivâts i financîrs, chei che a jerin dentri si son sierâts tal capanon par vê il timp di fiscâ i telefonins.
I sîs tecnics cjatâts dentri che a jerin di nazionalitât ucraine e l’autist dal camion che al è de Moldavie a son stâts blocâts (la acuse e je di associazion par delincui cul fin dal cuintribant di tabacs lavorâts) e puartâts in preson daspò che il judiç pes indagjins preliminârs di Pordenon al veve convalidât i arescj.
Il dam fat ae organizazion al è fuart: dome il tabac secuestrât al varès podût fâ vendi 3,9 milions di pacuts cuntun vuadagn di passe 20 milions di euros, ma al è soredut l’arest dai tecnics bogns di meti man ai machinaris a pesâ di plui.
Tal plan parsore dal capanon a son stâts ancje cjatâts 42 jets pronts par jessi doprâts di chei che a lavoravin dentri. (a.d.g.) – 08.06.2026
