Brut incident vuê a buinore aes siet e mieze dilunc de ex strade provinciâl 28, tra Siest e Bagnarole, in vie Trieste. Dôs machinis, une Fiat Punto e une Lancia Lybra, a si son dadis cuintri. A son restadis feridis cuatri personis: dôs di lôr in maniere grivie e a son stadis puartadis cul elicotar tal ospedâl di Udin.
Il bot al è stât fuart, tant che lis dôs machinis a son ladis tal fossâl bande de strade. Lis cundizions dai ferîts a son someadis a colp critichis, soredut chês dal vuidadôr de Punto – che al jere in viaç cun so fi – e dal passizîr di che altre machine. Ducj e doi a son stâts tirâts fûr dai lôr mieçs dal personâl medic di emergjence e dai pompîrs rivâts di S. Vît dal Tiliment, Pordenon e Puart, par jessi puartâts in svol tal ospedâl di Udin. Il fi di vincj agns dal vuidadôr de Punto e la femine che e vuidave la Lybra a son stâts puartâts tal ospedâl di Pordenon. I doi veicui a son stâts confiscâts su ordin de procuradore di turni, Federica Urban. Sul puest ancje la sindiche Zaida Franceschetti par savê alc des cundizions dai ferîts.
Par permeti lis operazions di salvament, la ex strade provinciâl 28 e je stade sierade al trafic par trê oris. Sul puest la Polizie locâl e jere che e à ancje fat i rilêfs. (a.d.g.) -14.01.2026
