“In graciis de aleance cu la Cuesture di Udin e al Comissariât di Polizie di Stât di Tumieç, di vuê utents e personâl sanitari a àn un pont di riferiment in plui pe lôr sigurece”. Lu à sotlineât cheste matine l’assessôr cun deleghe ae Salût dal Friûl-Vignesie Julie, Riccardo Riccardi, intervignût ae inaugurazion dal gnûf Puest di Polizie intai spazis dal presidi ospedalîr di Tumieç.
Al tai de curdele a àn cjapât part ancje il cuestôr di Udin Alfredo D’Agostino, il sindic di Tumieç Roberto Vicentini, il diretôr gjenerâl de Aziende sanitarie universitarie Friûl Centrâl Denis Caporale, il personâl dal presidi ospedalîr, tancj operadôrs de Polizie di Stât e bonsignôr Angelo Zanello, che al à benedît i gnûfs spazis. Il Pont di polizie si cjate a pocje distance dal Cup, pôc lontan de jentrade de struture, dongje des areis dal Pront socors. Al sarà atîf di vuê, ogni dì di lunis ae sabide, des 8 de matine aes 2 dopomisdì. (a.d.g.) – 04.09.23
