Pôc dopo des 6.20 di vuê di matine e je rivade ae sale operative dai Vigjii dal fûc di Pordenon la clamade di alarme par un fûc che al stave tacant intai implants di une aziende che a Manià e lavore tal setôr dal tratament e dal smaltiment dai refudums industriâi.
Sul puest a son rivadis scuadris di Manià e Spilimberc, judadis di une autoscjale e di un mieç cun bombulis di aiar pai pompîrs. Il fûc al jere tacât dal motôr di un traspuartadôr a curdele e al veve cjapât dentri il materiâl tratât, tant che cierts refudums a jerin lâts ancje tal dipuesit.
Lis flamis a son stadis daurman studadis prime che a rivassin a altris machinaris e a son tacadis lis operazions di bonifiche cu la rimozion di dut il materiâl che al è stât ancje bagnât. Nissun si è fat mâl. (a.d.g.) – 08.09.2026
