Te zornade di martars ai 7 di Avrîl, il teritori ator di Pordenon, in mancul di trê oris al è stât smicjât di une schirie di tentatîfs di fraude cuintri dai vielis: 19 in dut, ma un sol al è lat ben pal delincuent.
Il mecanisim doprât dai criminâi al è cognossût, ma dut câs al è bon di meti une vore in pinsîr lis vitimis, cuasi simpri feminis indenant cui agns e che a vicin di bessolis.
Chest il truc: e rive une clamade al telefon di un carabinîr fals che al vise che e je stade une rapine intune buteghe dal oresin, visant che i bandîts a son scjampâts cuntune machine che e veve la stesse targhe di chê de vitime o di un de sô famee; par sclarî ce che al è sucedût si invide il vieli a meti dongje dutis lis zoiis par consegnâlis a un carabinîr che al rivarà a cjase par fâ un control.
I fraudadôrs a àn batût soredut il teritori di Sacîl indulà che a àn provât par 16 voltis (une e je lade a segn), a Siest cun doi tentatîfs e a Pasian di Pordenon intun câs.
Il fraudadôr che al à rivât a puartâ vie la robe a Sacîl si è presentât tor des dôs e mieze dal dopomisdì ae puarte di une siore di 91 agns che e à consegnât dutis lis zoiis che e veve plui cualchi biliet di bancje.
Il fat positîf al è che a son cetancj i tentatîfs lâts mâl in graciis de informazion e sensibilizazion fate in chescj mês dai militârs in ducj i paîs. (a.d.g.) – 09.04.2026
