Une altre robarie fate dilunc dal dì de Madone di Avost e je saltade fûr in chestis ultimis oris in provincie di Udin. Cheste volte si trate di une robarie fate inte abitazion di un om di 61 agns di Cividât, intant che al jere fûr di cjase. I laris a son jentrâts fiscant un barcon e a àn puartât vie zoiis e bêçs par un valôr di passe 20 mil euros. Magari cussì no, l’om nol jere sigurât e su cheste robarie a stan investigant i carabinîrs dal Comant locâl.
E je une des tantis robariis sucedudis dentri di abitazions vueidis dilunc de zornade dai 15 di Avost, scuviertis dai parons di cjase dome cuant che a son tornâts indaûr des feriis.
Dome tra Udin e Tavagnà, a son stadis denunziadis altris trê robariis che a àn permetût ai delincuents di puartâ vie passe 150 mil euros. (a.d.g.) – 20.08.2024
