Vie pal fin de setemane passade a son stâts fats, dai carabinîrs dal Comant provinciâl di Udin, controi straordenaris par prevignî lis robariis, cuntune atenzion particolâr soredut a spazis di agregazion, centris comerciâi, placis e intai centris storics.
E i risultâts no son mancjâts parcè che a son stâts cjapâts in dut 4 zovins intant che a robavin vistîts.
Un zovin, che al è a stâ tal cjâf lûc, al è stât fermât dai carabinîrs de stazion di Udin Est dentri de buteghe di un centri comerciâl; cussì al è sucedût par un altri fantat di Udin, blocât cheste volte dai carabinîrs dal Nucli Radiomobile e simpri dentri di un centri comerciâl.
Un altri fantat di 19 agns, che al vîf fûr de nestre regjon, al è invezit stât denunziât dai carabinîrs di Martignà parcè che al veve cirût di puartâ vie vistîts e scarpis dopo vê tirât vie i dispositîfs cuintri des robariis e la robe e je stade tornade aes buteghis.
Ultime de schirie a jessi cjapade, une zovine di une altre provincie che e veve cirût di puartâ vie vistîts, simpri dentri di un centri comerciâl. (a.d.g.) – 27.04.2026
