Sîs citadins forescj a son stâts arestâts a Udin par vê gjestît un zîr di spaç di droghe in viâl Ungheria e dongje dal Parc Martiri delle Foibe. La operazion de Polizie di Stât, coordenade de Procure, e à permetût di scuvierzi une ativitât di vendite di hashish, cocaine e extasy, fate ancje a minôrs di etât.
I indagâts a son soredut pakistans, titulârs di un permès di permanence, che a platavin la droghe in cisis, tombins, casselutis de pueste o sot di autos parcadis. Cierts di lôr a controlavin ancje il puest par visâ se e fos rivade la Polizie.
Lis investigazions, fatis ancje cun videocjamaris, a àn permetût il secuestri di plui o mancul 1.600 grams di cocaine, 14 chilos di hashish e 70 grams di extasy. La zone e je cumò controlade in maniere straordenarie par impedî che a tornin i spaçadôrs. (a.d.g.) – 29.01.2026
