Intai dîs passâts i Carabinîrs forestâi di diviers reparts a àn fat percuisizions su deleghe de Procure de Republiche di Urbino a caric di sîs personis residentis intes regjons Marcjis, Emilie-Romagne e Friûl-Vignesie Julie. Tra chescj, trê arlevadôrs e comerciants di uciei che a fasin di riclam pe ativitât venatorie.
Ducj a risultin indagâts par plui reâts: robarie ingriviade ai dams dal Stât, ricetazion, alterazion di sigjîi, oselade e detenzion ilegâl di faune salvadie.
Lis investigazions – che a son duradis plui di dîs mês – a àn discuviert un grant trafic ilegâl di uciei di riclam; daûr de ipotesi de acuse i uciei a vignivin cjapâts in nature dilunc dal periodi de migrazion par dopo jessi “regolarizâts” cun anei impirâts in maniere sfuarçade intes gjambis che ur causionave lesions aes talpis.
Lis percuisizions di doi arlevadôrs residents in provincie di Udin a son stadis fatis dal Nucli Carabinîrs Cites di Triest e dal Centri Carabinîrs anticrimin nature di Udin.
A son stâts metûts sot secuestri ancje uciei cence anel identificatîf che a jerin in spiete de instalazion ilegâl dal stes.
Il trafic presumût al faseve vuadagnâ ai indagâts miârs di euros. Des investigazions al è vignût fûr di fat che intal periodi de migrazion, intune gnot, i braconîrs a podevin cjapâ cun rêts e riclams eletronics desenis di uciei che a vignivin tornâts a vendi dopo ai cjaçadôrs a presits pardabon alts dopo vêju “legalizâts” cui anei mitûts in maniere fraudolente. Daûr la tipologjie di riclam, a podevin rivâ fin a 180 euros pai mierlis, 200 euros pai dordeis canâi, e un presit ancjemò plui alt pai zenevrons. (ADG) – 1.10.2022
