Cui ultins doi arescj fats joibe ai 25 di Mai, e je terminade la lungje ativitât investigative che e à permetût ae Polizie di Stât di dismantelâ il grup di forescj che a Udin al veve trasformât la zone dal Parco Moretti e dal parc dal Cormôr in doi des placis principâls di spaç de capitâl furlane. La ativitât investigative e à permetût di individuâ 16 forescj, ducj di etnie afghane e pakistane, e di secuestrâ grancj cuantitâts di cocaine e hashish. Dîs lis personis arestadis, 6 chês denunziadis.
Dilunc dal control inviât di Zenâr 2022, a son stadis documentadis tantis venditis di droghe, che i son lâts daûr 7 arescj in flagrance di reât e il secuestri di 2 chilograms di cocaine e 350 grams di hashish.
La ativitât, coordenade de locâl Procure de Republiche, si è concludude cu la esecuzion de custodie cautelâr in preson cuintri di un afghan di 32 agns e, inte matinade dai 25 di Mai, cuntune serie di percuisizions che a àn rivuardât 17 personis domiciliadis o residentis in variis localitâts e une percuisizion fate intune palacine di viâl Vignesie, risultade jessi lûc abituâl di spaç.
La operazion, fate cu la colaborazion des Scuadris Mobilis di Milan, Vignesie, Triest, Trevîs, Gurize e Pordenon e l’implei di 2 unitâts cinofilis de Vuardie di Finance di Tarvis e 2 unitâts cinofilis de Polizie Locâl di Udin, e à permetût di arestâ in flagrance di reât doi prejudicâts citadins pakistans, un di 37 agns e un di 31 agns, che in doi apartaments di vie Podgora, a platavin 35 grams di cocaine e 400 grams di hashish, di là di une sume impuartante di bêçs (pôc plui di 11.000 euros), ritignude vuadagn de ativitât ilecite. (A.D.G.) – 30.05.2023
