I carabinîrs di Gurize a àn sierât in mût brilant une operazion cuintri di une rêt dal spaç in vore a Grau. La investigazion e jere tacade tal Jugn dal 2024 dopo de muart par overdose di un om di 43 agns. I investigadôrs, controlant i messaçs de vitime, a vevin rivât a individuâ il spaçadôr, un om di 35 agns di Grau che i son lâts daûr fintremai ae fin dal 2025, tignint sot control ancje il so telefonin. Il spaçadôr al doprave Telegram par procurâsi la droghe, doprant ancje la morose tant che corîr.
I carabinîrs a àn arestât il malvivent prime che al rivàs a scjampâ in Sud Americhe e la operazion e à ancje permetût di secuestrâ droghe come eroine, Mdma e la Ghb, une vore pericolose e clamade ‘droghe dal stupri’.
Tal principi di chest an a son ancje stâts denunziâts cinc compliçs e cussì al è stât sierât un sisteme criminâl che al puartave droghe sul teritori. (a.d.g.) – 29.04.2026
