Une bande di laris, specializade tal robâ filtris antiparticolât (Fap) e je stade cjapade de Scuadre mobile de Polizie di Pordenon intant che e jere daûr a passâ il confin. I trê citadins rumens a vevin za puartat vie tal Novembar dal an passat une desene di filtris dal dipuesit de Atap, fasint cetancj dams no dome pal valôr dai filtris che al jere di 150 mil euros, ma ancje par vie dal fat che une vore di mieçs a jerin restâts fers, lassant a pît centenârs di citadins.
Di chel fat a jerin tacadis lis investigazions par cjapâ une bande che si moveve in dute Italie rivant fintremai a Turin.
I filtris a vignivin puartâts vie par recuperà i metai di valôr che si cjatin dentri cuntun dam in dut di passe 330 mil euros. I poliziots a àn tacât a sta daûr aes olmis dai delincuents fin dal moment che a àn cirût di passâ il confin cu la Slovenie, cuant che a son stâts blocâts e arestâts. (a.d.g.) – 05.05.2026
