I miedis dal ospedâl di Udin a àn salvât tai ultins dîs dal an passât doi frutins operâts di urgjence daspò vê glotût robe a risi di scjafoiâsi.
I doi piçui a son stâts puartâts daurman inte sale operatorie, indulà che e à lavorât une équipe multidissiplinâr fate di anestesiscj, otoiatris e pneumolics. I miedis impegnâts a son stâts i anestesiscj Francesca Lucchese, Flavio Bassi e Chiara Pravisani; i otoiatris Cesare Miani e Simone Santini e i pneumolics Giuseppe Morana, Paolo Vailati e Alberto Fantin. Il prin frut rivât tal Pront socors pediatric al veve glotût un ogjet che al è stât tirât vie cence masse fadie. Il secont invezit, al è rivât inte sere dal ultin dal an e l’intervent al è stât plui complicât par vie dal fat che il piçul al veve glotût doi bagjigjis che a vevin scjadenade une reazion inflamatorie zontade a une brute polmonite. La operazion e je lade indenant par plui di dôs oris e e à permetût al picinin di tornâ a respirâ cence fature.
“Lis fiestis di Nadâl – al ricuarde il miedi Giuseppe Morana – a son un periodi a risi pe salût dai frutins parcè che propit in cheste part dal an si regjistre une cressite dai câs di inalazion di cuarps estranis. Tal câs dai bagjigjis, si trate dal plui impuartant câs di inalazion acidentâl pai frutins, ancje se in Friûl i câs a son tra i trê e i cinc par an”. (a.d.g.) – 08.01.2026
