Tecnics dal Socors alpin dal F-Vj e de Vuardie di finance in azion vuê di matine par judâ une femine di 50 agns che si jere fate mâl al cuel dal pît a 1.660 metris di cuote dilunc dal troi che al puarte bande dal ripâr De Gasperi. La Sores tra lis 11.30 e lis 12.15 e à clamât la scuadre dal Socors alpin di Prât di Cjargne adun cun chê de Vuardie di finance e l’elicotar regjonâl. La femine che e vîf in Piemont, compagnade dal om, si jere fate mâl no masse lontan dal riûl Pradibosc, intun toc une vore ert e tal bosc.
Il tecnic dal Socors alpin al è lat jù cu la binte dal elicotar par plui di 50 metris; daspò vele judade a movisi bande une zone plui adate pal recupar. La siore e je stade cussì tirade su in graciis de binte adun cul tecnic sul elicotar e puartade daurman tal ospedâl di Tumieç.
