Il Prefet di Triest, Annunziato Vardè, al è stât da cjâf îr di une riunion de Conference regjonâl des Autoritâts di sigurece publiche. Al incuintri, dedicât al teme des rivadis de rote balcaniche, a jerin presints i Prefets di Udin, Massimo Marchesiello, di Gurize, Raffaele Ricciardi, e di Pordenon, Domenico Lione, i Cuestôrs, i Comandants regjonâi e provinciâls de Arme dai Carabinîrs e de Vuardie di Finance e la Dirigjente de IV Zone de Polizie di Frontiere.
E je stade esaminade la situazion gjenerâl de sigurece sul teritori regjonâl, cun atenzion particolâr al fenomen dal flus migratori. I dâts dal an in cors, di fat, a evidenzin un aument consistent, a nivel regjonâl, dal 57% in plui a pet dal 2021. Il flus al à interessât soredut la ex provincie di Triest, dulà che l’aument al è stât di passe il 70% a pet dal stes periodi dal 2021. (ADG) – 13.12.2022
