Al va indenant il corot di dute la citât di Udin pe muart di Shimpei Tominaga. Sul lûc indulà che il citadin gjaponês di 56 agns al è stât pacât, la int e sta puartant rosis, sfueis cun messaçs e altris robis.
Tominaga al veve cjapât un pugn in muse intant che al cirive di judâ la vitime di une agression vie pe gnot tra vinars ai 21 e sabide ai 22 di Jugn de bande di cinc zovins rivâts di Trevîs, colant a tiere e sbatint fuart il cjâf tant di patî feridis cetant griviis che lu àn fat murî.
Tancj citadins a pensin che il so mot al sedi stât eroic parcè che nol à fat finte di nuie. Al è ancje cui, come il critic cinematografic Giorgio Placereani, che al à domandât che a Tominaga e sedi intitulade la strade indulà che e je stade la agression, pal esempli di sens civic e altruisim che al à dimostrât chest om. (a.d.g.) – 27.06.2024
