Il Codroipin sot dal atac dai laris dilunc dal puint de Liberazion
A continuin lis robariis intal Friûl di Mieç. Cheste volte la ondade di robariis e à colpît lis cjasis e lis ativitâts dal Codroipin. Vie pe gnot tra il 24 e i 25 di Avrîl inte frazion di Bugnins, a Cjamin di Codroip, a son stadis visitadis trê abitazions in vie Crescenzia, che di chês a son stâts puartâts vie zoiis di aur, bêçs in contants e dôs bicicletis.
Pôc distant invezit, a Vildivar, i laris a àn cjapât di smire la tratorie Di Bert dulà al è stât puartat vie il contignût dal regjistradôr di casse, plui o mancul 100 euros. In ducj i câs, lis vitimis a àn presentât daurman la denunzie ai carabinîrs che, intant, a son ancjemò ae ricercje dai doi zimui Lupin, saltâts in chescj dîs al onôr de croniche nazionâl parcè suspietâts di vê fat tantis ladrariis, simpri intal stes teritori, cu la tecniche de buse sul infìs. (A.D.G.) – 26.04.2023