Razisim tal stadi: si lavore par cirî i colpevui

da Andrea Ioime

“La gnot de vergogne” al è stât il titul di tancj gjornâi e telegjornâi che di sabide di sere a fevelin di chel che al è sucedût intal stadi di Udin vie pe partide cuintri il Milan. La reazion dal portîr dai aversaris Maignan, che al è lât fûr dal cjamp par protestâ, provocant une interuzion di cinc minûts de partide e il dì dopo al à dit clâr e net “mi àn dit simie”, al à discjadenât un infier. Udin, che a pene che un mês indaûr e jere stade votade miôr citât di Italie, e je deventade la cove dal piês razisim, daûr des notiziis che a àn fat daurman il zîr dal mont. Dome che la cuesture, che e je daûr a analizâ i videos zirâts tal stadi di centenârs di telecjamaris di sigurece, e sa o e savarà la veretât. Intant a son rivadis lis acusis, ma ancje lis difesis: chês di zuiadôrs tant che Zoff, Behrami, Deulofeu, cuintri il razisim, ma ancje cuintri l’atac a ducj i furlans. La stesse posizion dal governadôr dal F-Vj, Massimiliano Fedriga, che al à condanât “ogni forme di razisim”, ma al à invidât a viodi la diference “jenfri un piçul grup isolât e ducj i tifôs e i abitants de regjon, che no son raziscj”. Il sindic di Udin, Alberto De Toni, al à ufiert ancje la citadinance onorarie al portîr dal Milan e la societât blancje e nere e à anunziât la massime colaborazion cu lis autoritâts judiziariis par cjatâ fûr cui che al à dit lis peraulis incriminadis. Se nol fos cussì, la scuadre e riscjarès sanzions, de disfate par 3-0 ae sierade di un setôr dal stadi o di dut l’implant. (A.I.) – 22.01.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui