Pôc dopo des 11 sot sere di îr a Puçui, la titulâr dal Caffè Marcuzzi e je stade rapinade. Noemi De Simon, 80 agns, come ogni dì e veve sierât il locâl tal centri dal paîs e e jere montade in machine par tornâ a cjase inte frazion di Cjargnà, poiant la borsete cul incàs su la sente dal passizîr. Nancje il timp di visâsi di ce che al stave sucedint e un om no cognossût al à vierte la portele e intun lamp al à cjapât svelt la borsete par dopo scjampâ.
Dut al è sucedût in pôcs seconts e la siore e à clamât in jutori la fie Sylvie Marcuzzi che e je a stâ parsore dal bar. Sul fat a stan investigant i carabinîrs di Mortean, che a stan ancje cjalant lis imagjinis des videocjamaris di control inte zone.
La int e je une vore in pinsîr, ancje parcè che a son stadis cetantis robariis dentri des cjasis e si tache a vê pôre. Ancje par chest il sindic Gabriele Bressan al racomande ai citadins di stâ une vore atents. (a.d.g.) – 21.10.2025
54
