Volontaris in socors de Emilie-Romagne
A son numerôs i volontaris de Protezion civîl dal Friûl-Vignesie Julie impegnâts in Emilie-Romagne intai socors aes popolazions colpidis de gnove aluvion che e je daûr a meti in zenoglon larcs teritoris. La prime partence e je stade inte serade dai 15 di Mai, cuntune colone che e à puartât a Predappio une grande idrovare “Buine di pompâ ancje aghe sporcje in timps tant svelts – al à ricuardât l’assessôr regjonâl ae Protezion civîl Riccardo Riccardi – favorint duncje lis operazions di messe in sigurece dal teritori e des comunitâts”. Po dopo, inte prime matinade dai 17 di Mai, al è partît un gnûf convoi cun 30 volontaris in direzion di Forlì, dulà che la situazion e je simpri plui dificile a man a man che a passin lis oris.
Intant che o scrivìn, lis gnovis che a rivin des zonis aluvionadis a son tant preocupantis: si regjistrin diviers muarts e si stime che a sedin plui di 13 mil lis personis sfoladis. Duncje nol è escludût che de nestre regjon a partissin intes oris prossimis altris aiûts. (A.D.G.) – 17.05.2023
