A Pordenon l’abatiment di 47 teis di place XX Setembre al à gjenerât fogoladis, sit-in, protestis e ricors al Tar e al Consei di Stât. A Udin, invezit, la eliminazion di plui o mancul 500 plantis intai ultins 5 mês e je daûr a alimentâ un dibatiment politic vivarôs, fat a colps di interogazions consiliârs o post sui Social.
L’ultin at inte capitâl furlane al è stât regjistrât vuê, cul principi dal abatiment di altris 7 castagnolârs a pericul di colade in Zardin Grant. I lavôrs su la bande Nordest de place a saran completâts doman dai assegnâts comunâi dal Vert public che a àn valutât il stât di salût des plantis presintis dilunc de elìs dopo la colade di un arbul de stesse specie sucedût ai 4 di Dicembar.
I esams fats e lis provis di trazion a àn fat vignî sù il stât orent dai troncs, comprometûts in maniere ireparabile de proliferazion di un fonc e dai dams aes lidrîs causâts intai agns dai intervents e dai sgjâfs su la pavimentazion ator. Un abatiment necessari e urgjent, duncje, par garantî la sigurece di un sît come Zardin Grant che intai oraris di ponte al è un di chei plui traficâts e frecuentâts de citât.
“Pe prime volte dopo une vore di agns la salût dal vert public e rapresente une prioritât pe citât di Udin. In chescj mês di fer vegjetatîf o stin fasint dai intervents fondamentâi pe salût dal patrimoni arboricul dal nestri teritori comunâl e tra chescj intervents a son ancje dai abatiments di arbui muarts o comprometûts in maniere ireparabile”, al à sclarît l’assessôr al Vert public Ivano Marchiol.
Dubis sul numar dai abatiments inte capitâl furlane a continuin però a rivâ dai bancs de minorance. Dopo lis interogazions resintis in Consei comunâl, ae viste dai gnûfs tais in Zardin Grant, il conseîr di Fratelli d’Italia Antonio Pittioni vuê al è intervignût cuntun post su Facebook saborant la polemiche. “A Udin si svicinìn aes 500 plantis taiadis in 5 mês – al scrîf il rapresentant de oposizion -. Cent arbui taiâts par ogni mês, plui di 3 par dì, e no ducj a jerin malâts”, al sotlinee Pittioni. (a.d.g.) – 20.02.2024
