“Dentri de fin di Març, Fvg Strade, tant che gjestôr de strade regjonâl 177, e viodarà de instalazion di doi autovelox fis, un plui a Sud in Comun di Çopule e chel altri a Nord in Comun di Spilimberc. Cun di plui, simpri intal periodi curt, a vignaran metûts in vore altris doi intervents par miorâ la sigurece, in particolâr rivuart ae velocitât alte e ai sorpàs pericolôs. Il prin al rivuardarà, in vie sperimentâl, la segnaletiche verticâl cul posizionament intal centri de cjarezade di une linie continue sonore intai trats caraterizâts di grumbulis, arcadis o svincui. Chel altri proviodiment al ponte a rinfuarçâ la segnaletiche verticâl traviers la instalazion di lampizantis cun cartei par informâ su la presince dai controi in mût di creâ un dissuasîf de velocitât alte e dai sorpàs pericolôs”. A anunziâ i proviodiments che a tacaran intes setemanis prossimis l’assessôr regjonâl aes Infrastruturis e teritori, Cristina Amirante, cheste matine intal cors di un vertiç clamât dongje dal prefet di Pordenon Natalino Domenico Manno par fâ il pont su la sigurece stradâl, in particolâr dilunc de Çumpiel-Secuals (strade regjonâl 177) dopo l’incident stradâl resint che al è costât la vite a trê personis.
Intal incuintri in Prefeture a jerin presints, di là dai vertiçs provinciâi des Fuarcis dal ordin, ancje i sindics dai Comuns interessâts dal passaç de strade. Di là dai proviodiments che a saran fats intal imediât, l’assessôr e à tabaiât ancje dai intindiments de Regjon di meti in vore, par incressi la sigurece de arterie stradâl intal medi lunc periodi. “Dilunc de strade – e à dit Amirante – il trafic al è destinât a cressi par dôs resons fondamentâls. Prin di dut, cu la viertidure resinte de Pedemontana Veneta a son daûr a regjistrâ incressitis di trafic su la A28 e, di consecuence, su la Çumpiel-Secuals. Cun di plui, i flus a cressaran ancje cul sprolungjament, che la sô progjetazion e je al studi de Regjon, de strade in direzion Udin Nord. Dôs cundizions che nus sburtin – e fâs savê l’esponent de Zonte regjonâl – a valutâ une dopleade des corsiis. No tant par creâ une autostrade, ma par riprodusi la situazion di cumò, cun dople corsie par ogni sens di marcje e bariere centrâl, presinte intal trat tra il svincul di Çumpiel e la taronde di Pian di Pan dulà che la incidentalitât e je tant minôr”. (a.d.g.) – 15.01.2024
