La ativitât de Polizie locâl di Udin e sarà rinfuarçade intal centri storic e tal borc de stazion. Vuê di matine al è rivât il vie libare de Zonte comunâl al progjet par incressi la ativitât di control dant cussì subite une rispueste aes domandis saltadis fûr tal ultin Comitât pal ordin e la sigurece de setemane passade in prefeture.
Cumò intal borc de stazion e je za presinte une patulie de Polizie locâl che, adun cui coleghis di chê di vuardie ator pes stradis, a fasin controi fin des 7.30 sot sere intant che tal centri storic e je ative une patulie di pront intervent des 7.30 di matine fin ae une e mieze di gnot.
Il progjet al previôt che de seconde setemane di Jugn i agjents de Polizie locâl a sedin presints fin ae miezegnot intant che il lôr numar al sarà dopleât in vie Leopardi, in vie Roma, dongje de stazion dai trens e des corieris. (a.d.g.) – 28.05.2024
