Intant che a fasevin controi dongje dal casel auostradâl dal Lisert, la Vuardie di Finance dal Comant di Gurize à intercetât un mieç pesant che al lave bande il confin sloven.
Dentri dal veicul, cun targhe cravuate e che al veve di puartâ in Cravuazie materiâi di costruzion, i agjents a àn cjatât 101 pacuts, ognidun di plui o mancul un chilo, metûts dentri di trê borsis platadis dentri de cabine.
I financîrs a vevin dome ordenât al camion di fermâsi, viodût che un dai siei proietôrs al jere rot. Il vuidadôr però no si jere fermât e, profitant dal grant trafic di veicui pesants, al jere lat indenant. Daspò jessi corûts daûr e vê fermât il veicul, i agjents a son stâts metûts in suspiets dal compuartament gnervôs dal condutôr. Dentri de cabine a àn cjatât lis trê borsis cun dentri i 101 pachets di cocaine di alte purece. A vadin indenant lis investigazions par scuvierzi la vere destinazion de droghe, che une volte taiade e metude in vendite e val plui o mancul 20 milions di euros. Il mieç, regjistrât intune compagnie cravuate, al jere vuidât di un vuidadôr serp che al è stât arestât par possès, traspuart e trafic di droghe ingriviâts de grande cuantitât e al è stât puartât inte preson di Gurize, indulà che al è a disposizion des autoritât judiziarie. (a.d.g.) – 05.01.2026
