Un piçul di 18 mês al è stât scotât in maniere une vore grivie de aghe bulinte che e jere dentri di un bulidôr a S. Vît dal Tiliment îr sot sere e al è stât puartât cul elicotar daurman tal ospedâl di Borgo Trento a Verone.
Il frutin, che al è stât ricoverât tal repart di Terapie intensive pediatriche, intun moment che i gjenitôrs no lu cjalavin al varès tirât jù il bulidôr tant che la aghe bulinte i è rivade intor. A son stâts propit la mari e il pari a puartâ daurman il frutin tal ospedâl di S. Vît indulà che al è rivât in cundizions griviis parcè che al veve ustions in plui parts dal cuarp.
Daspò des primis curis daurman l’elicotar lu à puartât tal ospedâl venit. Il picinin al à ustions di secont grât intun un braç, tal cuel e inte muse. (a.d.g.) – 10.10.2025
