A son stâts butâts etolitris di idrocarbûrs te roie Codafora, tal plen centri di Pordenon. A saran lis analisis de Arpa dal F-Vj a cirî di capî ce che e je la robe oleose che îr, sot sere, e à tacât a incuinâ lis aghis di un dai plui impuartants afluents dal flum Nunciel. Al podarès tratâsi di gasoli o petroli blanc. Nol è nancje clâr se l’incuinament al sedi stât fat a puest di cualchidun che al à svuedât une cistierne o se al sedi il risultât de roture di un tubi. A sclarî dut a saran lis investigazions de Polizie locâl.
L’alarme al è tacat îr sere cuant che te centrâl operative dai Vigjii dal Fûc a son rivadis cetantis segnalazions di un une fuarte puce di gas tal centri di Pordenon. I pompîrs a àn daurman cjatât ce che al puartave tant odôr e i volontaris de Protezion civîl a àn daurman metût ju dilunc de roe barieris fatis a pueste par blocâ il licuit incuinant che dut câs al è za rivât tal Nunciel. (a.d.g.) – 27.08.2025
