Pes di divignince discognossude, sierât un ristorant inte Basse furlane

Sigjîi intun ristorant de Basse furlane dulà che a son stâts cjatâts 3 cuintâi di aliments – pronts ae vendite – cence documents che a dimostrin la divignince e la segnabilitât.

Tra dispense e celis frigorifaris, i oms de Vuardie Costiere di Puart di Noiâr e de Aziende Sanitarie Universitarie dal Friûl Centrâl a àn cjatât diviers prodots, itics e no dome, di origjin discognossude.

I ispetôrs dal Ufici Circondariâl Maritim e i tecnics di Asufc a àn rilevât ancje carencis sul rispiet des normativis in materie di igjiene, sigurece e gjestion dai aliments. Di là des sanzions aministrativis, lis criticitâts saltadis fûr a àn puartât al secuestri de marcjanzie e ae sospension de ativitât comerciâl. (a.d.g.) – 29.01.2024