Ancjemò episodis di agression viers dal personâl sanitari. Sabide ai 7 di Zenâr une dotore, specializant medic di 28 agns in servizi ae vuardie mediche dal Gervasutta di Udin, e je stade agredide intal plaçâl esterni dal ambulatori.
A metii lis mans al cuel un om che al veve acompagnât un cognossint di nazionalitât pakistane che al veve bisugne di une medicazion a une gjambe. A jerin lis 6 sot sere cuant che la dotore, in servizi cuntune coleghe di 31 agns, si è cjatade di front i doi oms: che un di chei al presentave une fassadure scjassose a une gjambe, che e platave lesions di ulçare. A front di chês feridis, i doi miedis a àn conseât al pazient di lâ al Pront socors parcè che lôr no vevin i struments necessaris par intervignî.
Il tradutôr al à tabajât in mût menaçôs al miedi, domandant cun indurance che il ferît al fos curât. I doi oms a son stâts invidâts a lâ fûr e al è propit al esterni che e je sucedude la agression, che no à vût consecuencis plui gravis in graciis dal intervent de coleghe. Intant a jerin stâts alarmâts i Carabinîrs che a àn identificât l’agressôr, dopo denunziât. La dotore agredide e à scuignût ricori aes curis ospedalieris.
Intai dîs passâts, invezit, a finî inte smire al jere stât un infermîr, pacât di un pazient al Centri di salût mentâl di Triest. Un utent, che i jere stât domandât di spietâ il passaç di consegnis prime di fevelâ cui operadôrs, al veve scomençât a rabiasi e, a pene dopo, a dâ pidadis e pugns cuintri l’infermîr, che al veve vût bisugn des curis dal Pront Socors. (A.D.G.) – 09-01-2023
