Si pues pardabon dî che chest Invier a For Disore no varessin di patî il frêt! La Vuardie di finance di Triest e à regalât al Comun di For Disore plui di 24 toneladis di pellet che al rivave de Bosgne.
Chest caric di pellet, un rimorchi intîr, al veve di jessi vendût sul marcjât talian, ma al jere stât secuestrât parcè che la marche Enplus che e certifiche la cualitât dal prodot e jere falade. Lis indagjins fatis dai financîrs a vevin di fat discuviert che la aziende che e impuartave il materiâl no jere autorizade a doprâ la marche e par chest al è stât contestat il reât di fraude tal cumierç e contrafazion, tant che pai responsabii e je partide la denunzie ae autoritât judiziarie.
Su decision de Procure di Triest, il pellet invezit di jessi distrut al è stât regalât al Comun cjargnel che al à dât acet a cheste donazion cuntune vore di ricognossince tant plui che si sta svicinant l’Invier. (a.d.g.) – 21.10.2025
