2/05/2022 – La Polizie Postâl di Triest e Udin, cul coordenament dal Servizi Polizie Postâl e des Comunicazions, al à concludût la operazion ‘Luna’, finalizade al contrast de pedopornografie in linie, cu la esecuzion di 32 decrets di percuisizion su dut il teritori nazionâl, 25 a cjame di maiôrs di etât e siet viers di minôrs, che al à permetût l’arest di une persone e la denunzie di altris 30 a vari titul par detenzion, cession e divulgazion di materiâl pedopornografic.
La operazion e je risultade de analisi dal materiâl informatic secuestrât a un citadin resident in Friûl, arestât l’an passât intal cors di une altre ativitât di investigazion e dopo condanât par detenzion, divulgazion e produzion di materiâl pedopornografic.
I specialiscj de Polizie Postâl, a son rivâts a ricostruî la largje rêt di contats che a scambiavin cul arestât tancj leams che a contegnin imagjins e video che a riprodusin ats di sfrutament sessuâl in dam di minôrs, cualchi volte in cambi di imagjins di fantaçutis minôrs che il sogjet al veve intal timp sedot, concentrantsi su lis vitimis plui fragjilis.
Midiant dal coordenament dal Centri nazionâl di contrast de pedopornografie in linie, al è stât pussibil ativâ la rêt di cooperazion internazionâl par cjatâ il numar massim di elements informatics utii pe individuazion dai utents coinvolts. MR
