Comunicazions sociâls faladis, refût di ats di ufici e peculât. A son lis ipotesis di reât notificadis de Procure de Republiche di Udin a nûf personis pal dissest finanziarii de aziende di servizis aes personis Daniele Moro di Codroip, che intai agns e veve ingrumat debits par 8 milions di euros. Il debit al jere calât a sîs milions di euros dopo che al jere stât vendût un imobil, ma la struture e jere stade comissariade de bande de Regjon tal 2022.
A dâ il vie ae investigazion e jere stade une denunzie dal avocat Maurizio Miculan su incarghe dal comissari Salvatore Guarnieri. Tai dîs passâts il public ministeri Giorgio Milillo al à notificât aes parts la sierade des investigazions. Intal regjistri dai indagâts a son stâts il diretôr gjenerâl de Asp Valentina Battiston di Udin, i conseîrs di aministrazion Luciano la Tona di Codroip, Aldo Mazzola di Udin e Marco Monai di Basilian, i presidents dal Consei di aministrazion Giovanni Castaldo di Udin e Cristiano Molaro di Udin, i revisôrs dai conts Andrea Stedile di Cividât e Sergio Cecotti di Romans dal Lusinç e la responsabil dal servizi sociâl dai Comuns dal Ambit di Codroip, Anna Catelani. (a.d.g.) – 17.07.2025
