Patizament pal imprenditôr di Cividât Giovanni Dorbolò

Doi agns e doi mês di reclusion. Al à patizât, joibe ai 7 di Lui devant dal Gip di Udin Emanuele Lazzaro, l’imprenditôr cividin di 41 agns Giovanni Dorbolò, cognossût per produzion di energjie eletriche rinovabile.
Dorbolò al jere acusât di bancjerote in relazion ae Olea Srl e ae Tilia Srl, falidis intal 2019, che di chês al jere aministradôr unic. Dut al sarès zirât ator dal implant di produzion di energjie eletriche Syngas di Cividât. L’imprenditôr al varès metût l’implant, no ancjemò fat, dentri lis imobilizazions dai belançs 2014 e 2015 di Olea e in chei dal 2014 al 2016 di Tilia. Al varès puartât dopo ae societât Energy Lab, falide intal 2018 e socie di maiorance di Tilia, 344 mil euros leâts al implant a titul di restituzion dai finanziaments cuant che la Tilia si cjatave za in brutis aghis, prejudicant cussì chei altris creditôrs. (A.D.G.) – 08.07.2022