A àn dât bogns risultâts i controi fats dai carabinîrs dilunc des stradis de Basse. A Tisane i carabinîrs de stazion di Palaçûl a àn denunziât une femine di 24 agns resident in Venit daspò che e jere lade fûr strade e che e jere risultade positive al alcoltest. Ae femine e je stade ritirade la patente di vuide. Simpri a Tisane i carabinîrs de stazion locâl a àn dât esecuzion a un ordin di carcerazion cuintri di un om di 68 agns pandût fûr de Cort di Apel di Triest. L’om al è stât puartat te so cjase indulà che al varà di restâ par cuatri agns e 5 mês daspò jessi stât condanât par trafic di droghe.
Risultâts ancje dai controi fats a Lignan: un zovin di 23 agns al è stât cjatât cun intor piçulis dosis di marihuane e hashish e par chest al è stât segnalât par detenzion di droghis, intant che i coleghis dal Nucli operatîf de Compagnie di Tisane a àn cjatât un forest di 27 agns che cuintri di lui al jere un proviodiment european di arest e di estradizion bande de Austrie par lesions griviis. L’om al è stât puartat te preson di Udin in spiete de decision dai judiçs. (a.d.g.) – 09.06.2026
