A cjatin un fantat di 18 agns inte zone de autostazion di Tumieç cun intor une piçule cuantitât di marihuana e a scuvierzin che in cjase so pari, 48 agns, al à inviât une ativitât floride di coltivazion de plante. L’om al è stat arestât par detenzion e produzion di stupefacentis; validât il fer, il Jip al à disponût intai siei confronts la misure cautelâr dal oblic di presentazion ae Polizie judiziarie.
La ativitât e je di lunis ai 14 di Novembar, cuant e jere stade inmaneade une operazion antidroghe de Polizia di Stato dal Comissariât di Tumieç e de Polizie locâl de Comunitât di Mont de Cjargne, cul supuart di une unitât cinofile de Polizie locâl di S. Michêl al Tiliment.
I agjents, di misdì, a àn ispezionât in particolâr la stazion, zone une vore frecuentade di students zovins in passaç par rivâ in diviers Comuns de Cjargne. Aes une e vincj dopomisdì il cjan antidroghe al à segnalât un fantat cjargnel di 18 agns, cjatât in possès di plui o mancul 0,75 grams di marihuana par ûs personâl.
A chel pont e je saltade la percuisizion domiciliâr. In cjase, simpri cul judori de unitât cinofile de Polizie locâl, i agjents a àn cjatât une vere e proprie coltivazion di cannabis. (ADG) – 17.11.2022
