Un imprenditôr di Palermo che al lavore tal setôr de cantieristiche navâl a Triest al è stât acusât di vê puartât vie i bêçs de sô aziende par no paiâ i creditôrs. A scuvierzi dut il Nucli di Polizie economiche – finanziarie de Vuardi di Finance di Triest che dopo de sô investigazion la imprese e je stade metude in licuidazion cuntun passîf di passe 8 milions di euros.
L’imprenditôr, secont la acuse, al veve falsificât par agns i belançs par platâ la situazion di crisi e puartâ vie i bêçs des cassis de societât, che a jerin metûts su conts corints siei o de sô famee. E cussì l’om al varès spindût une vore di bêçs in viaçs, concierts, orlois di marche e zoiis, a discapit dei dipendents, dai creditôrs e de Aministrazion finanziarie. (a.d.g.) – 15.09.2025
