31
La Cort di Assise di Udin e à condanât a 27 agns e 4 mês di preson Anderson Vasquez Dipre, l’om che tal Prin dal an, inte buinore, al veve copât cuntune tace Ezechiele Mendoza Gutierrez.
Il fat al jere sucedût ai prin di Zenâr dal 2024 tal locâl Ai laghetti Alcione di Udin. Tal particolâr, a Dipre a son stâts dâts 24 agns pal omicidi e altris trê agns e cuatri mês pe evasion, parcè che il dominican al jere lât tal locâl par fâ fieste cundut che al jere ai arescj domiciliârs.
Al è stât escludût l’ingriviament pai motîfs futii e pe difese minorade che al jere stât domandât de publiche acuse. Il sassin al è stât ancje condanât a paiâ un risarciment ae famee di Mendoza Gutierrez. (a.d.g.) – 09.05.2025
