Pacare e cjape fûc tal plaçâl di une aziende te zone industriâl di S. Vît dal Tiliment

Tor de une e mieze dopomisdì di vuê e à cjapât fûc une pacare intal plaçâl di une aziende che e prodûs biogas inte zone industriâl Ponte Rosso di S. Vît dal Tiliment. Intant che la pacare e stave cjamant la blave che e veve di lâ tai biodigjestôrs, si son impiadis flamis dal motôr.

Il vuidadôr al è smontât jù di corse e di une aree in sigurece al à clamât i pompîrs, rivâts sul puest in pôc timp, che a àn rivât a distudâ il fûc blocantlu prime che al tacàs i implants che si cjatavin dongje. (a.d.g.) – 14.10.2025