Operazion “Stazions siguris” in F-Vj

Ben 62 agjents de Polizie Feroviarie, judâts des unitâts cinofilis de Vuardie di Finance di Triest, miercus ai 15 di Fevrâr a son stâts impegnâts su dut il teritori regjonâl inte seconde zornade di controi straordenaris dal 2023 clamade “Stazions Siguris”. A son stadis controladis 25 stazions feroviariis intal arc des 24 oris e plui di 1.200 personis.  Cuatri i indagâts a Triest: un zovin al è stât denunziât par vie che al jere scjampât dai arescj domiciliârs; doi citadins talians, il prin pe robarie di bêçs intes machinetis automatichis e chel altri par imbroi; un citadin forest par imigrazion clandestine. A Monfalcon doi zovins cence regolâr biliet a àn furnît falsis gjeneralitâts al cjâf di tren e a son stâts identificâts e denunziâts de Polfer intervignude su domande dal personâl feroviari par une verifiche dai dâts furnîts. A Tarvis a son stâts denunziâts par imigrazion clandestine cinc citadins forescj. (A.D.G.) – 17.02.2023