Sul cricâ dal dì i carabinîrs de Compagnie di Udin, judâts dal Nucli elicotars di Bolzan e dai reparts cui cjans di Davian a àn fat une operazion anti droghe te aree de Ex Safau, dongje de stazion dai trens di Udin. Cuindis di lôr a son stâts arestâts parcè che considerâts responsabii di associazion cul fin dal trafic, detenzion e spaç di droghis.
Lis investigazions a jerin tacadis tal 2024 e si jerin sieradis tal 2025 daspò des tantis segnalazions fatis di citadins che a son a vivi tal cuartîr di “Borgo stazione” sul fat che a jerin in vore spaçadôrs forescj. I carabinîrs de sezion operative de Compagnie di Udin a àn verificât che la aree industriâl ex Safau, tacade dal cuartîr, e jere stade trasformade intun lûc di spaç de droghe viert dut il dì indulà che e lave une vore di int rivade di dute la regjon par comprâ droghe, soredut cocaine e hashish, cun int di vuaite par controlâ ce che al sucedeve.
I carabinîrs a àn scuviert che dute le organizazion criminâl e jere vuidade di doi citadins pakistans (cumò in preson) judats di afghans e marochins intant che lis ativitâts di traspuart de droghe e jere stade dade a dôs feminis, une ucraine e une taliane. Si pense che a l’incàs ogni dì al fos tra i 10 e i 20 mil euros e che chei che e judavin tal spaç a cjapassin tra i 1.500 e i 2.000 euros al mês. La cocaine e rivave de Slovenie intant che la hashish e rivave de Lombardie, dongje Milan.
Dulinvie de operazion a son stâts segnalâts 180 drogâts, arestâts 19 sogjets e secuestrâts 6 chilis di droghe. (a.d.g.) – 01.07.2026
