Cjatât cence vite vuê di matine inte Distilleria Durbino Friulia di Pasian di Prât un operari di 54 agns, Italo Carpi, di Feagne. Il cuarp dal om si cjatave dentri di une cistierne e a inacuarzisi dal fat a saressin stâts i coleghis che a àn ancje cirût di rianimâlu cence sucès.
Sul puest a son rivâts il personâl sanitari, i Vigjii dal fûc e i esperts dal Spisal, il servizi di prevenzion, igjiene e sigurece dai ambients di lavôr. I pompîrs a son jentrâts inte cistierne par recuperà il cuarp intant che e rivave inte aziende la fie de vitime, visade dai carabinîrs.
I locâi indulà che al è stât l’incident a son stâts metûts sot secuestri: “No vin ancjemò lis cjartis – al à visat il procuradôr di Udin, Massimo Lia – ma dal sigûr al sarà viert un fassicul su chest incident”. (a.d.g.) – 107.04.2026
